ҚР Қаржы министрлігі салық есептілігін ұсынуды тоқтата тұру тәртібін таныстырды:
“Қазақстан Республикасы Салық Кодексінің 213-бабының 1-тармағына сәйкес салық төлеушінің салық өтініші негізінде салық есептілігін табыс етуді тоқтата тұруға, салық есептілігін табыс етуді тоқтата тұру мерзімін ұзартуға немесе салық есептілігін табыс етуді қайта бастауға құқығы бар”, – делінген министрлік хабарламасында.
Сондай-ақ министрлік мәліметінше, азамат тарапынан салық бойынша есеп беруді етуді тоқтата тұру, оны қайта бастау не ұзарту туралы шешім қабылданған жағдайда, қызметті тіркеу орны бойынша салық төлеуші (салық агенті) мемлекеттік кірістер органына салық өтінішін ұсынады.
Ол үшін салықтық есептілік беріледі және салықтық өтініш жазылады. Қызметті тоқтата тұру туралы салықтық өтінішті салық есептілігімен бір мезгілде ұсынып немесе одан кейін де беруге болады.
Салық есептілігін табыс етуді тоқтата тұрудың жалпы мерзімі Салық Кодексінің 48-бабында белгіленген талап ету мерзімінен, яғни үш жылдан аспауы тиіс.
Салық бойынша есеп беруді тоқтата тұру мерзімі аяқталғанға дейін, қызметті қайта бастау туралы шешім қабылданған жағдайда, салықтық өтініш беріледі. Сонымен қатар салық есептілігін табыс етуді тоқтата тұру мерзімін ұзарту туралы шешім қабылданған жағдайда салық өтініші табыс етіледі. Ұзарту үш жылдан аспайтын жалпы мерзімді ескере отырып, салық өтінішінде көрсетілген кезеңге жүзеге асырылады.
Мемлекеттік кірістер органы салық өтінішін алған күннен бастап бір жұмыс күні ішінде салық есептілігін табыс етуді тоқтата тұруға (ұзартуға, қайта бастауға) немесе салық есептілігін табыс етуді тоқтата тұрудан бас тартуға міндетті.
Салық төлеушінің (салық агентінің) салық есептілігін ұсынуды тоқтата тұруына мына жағдайларда жол берілмейді:
1) өтініш берілген күнге салық берешегі, әлеуметтік төлемдер бойынша берешегі болса;
2) мыналарды ұсынбау фактілері болса:
– талап қою мерзімін ескере отырып, салық есептілігін;
– қосылған құн салығы бойынша тіркеу есебіне қоюға салық өтінішін;
3) салық органымен әрекетсіз деп танылса;
4) салық органы жіберген хабарламаларды орындамаса.
Заңды тұлға үшін қызметті тоқтата тұру туралы шешімді құрылтайшылар жиналысында немесе компанияның жалғыз құрылтайшысы қабылдайды.
