ҚР Денсаулық сақтау министрлігінің Алматы қаласының Орталық қалалық клиникалық ауруханасы науқастарының АИТВ (ВИЧ) жұқтыру дерегіне қатысты мәлімдеме жасады, деп хабарлайды Kazbusiness.kz
“ҚР Денсаулық сақтау министрлігінің ЖИТС орталығының мамандары Алматы қаласының Орталық қалалық клиникалық ауруханасында (ОҚКБ) ем қабылдаған адамдардың арасында АИТВ-оң мәртебесі бар үш жағдайды анықтады. Осы факті бойынша ҚР ДСМ Санитариялық-эпидемиологиялық бақылау және Медициналық және фармацевтикалық бақылау комитеттері тексеруді бастады. Комиссияның құрамына ҚР ДСМ Қазақ дерматология және инфекциялық аурулар ғылыми орталығының мамандары тартылды”, – делінген хабарламада.
Денсаулық сақтау министрі Ажар Ғиният оқиғаның себебін анықтау үшін Денсаулық сақтау министрлігі мен санитарлық-эпидемиологиялық бақылау комитеті қызметкерлерінен құрылған комиссия Алматыға жіберілгенін айтты.
“Біз ауруханаішілік инфекцияны жоққа шығарғымыз келеді. Тексеруден өткен бойда толық ақпарат береміз. Енді біз толық эпидемиологиялық тексеру жүргізуіміз керек. Инфекцияның қайдан шыққанын, инфекцияның таралу жолын, аурухана ішінде жұқтыру болды ма соны тексереміз, – деді Ажар Ғиният.
Министр келтірген деректеріне сүйенсек, былтыр Қазақстанда 4 мың адам АИТВ індетін жұқтырған. 2021 жылы 3,5 мың жаңа жағдай тіркелген.
Естеріңізге сала кетсек, Денсаулық сақтау министрлігінің ЖИТС орталығының мамандары Алматы қаласының Орталық қалалық клиникалық ауруханасында (ОҚКБ) ем қабылдаған адамдардың арасында АИТВ-оң мәртебесі бар үш жағдайды анықталған болатын.
