Бүгінгі Үкімет отырысында Индустрия және инфрақұрылымдық даму министрі Марат Қарабаев алдағы уақытта шағын өнеркәсіптік аймақтарды іске қосу жоспарланғанын айтты, деп хабарлайды kazbusines.kz.
ҚР ИИДМ министрі хабарлауынша, 2029 жылға дейін 800-ден астам инвестициялық жобаны іске асыру арқылы 147 мыңға жуық жұмыс орнын ашу жоспарланған. Бұл жобалар негізінен машина жасау, құрылыс индустриясы, жеңіл өнеркәсіп және металлургия салаларын бойынша жүзеге асырылады.
«Осы қолға алынған жобаларды қажетті инфрақұрылыммен қамтамасыз ету мақсатында шағын өнеркәсіптік аймақтар іске қосылады. Бұған тиісті қаражат Өнеркәсіпті дамыту қоры арқылы қарастырылмақ», – деді Марат Кәрімжанұлы.
Сонымен қатар министр шикізатты терең өңдеп, дайын өнімнің үлесін ұлғайтуға жол ашатын 20 жобаның пулы қалыптасып отырғанын хабарлады. Оның айтуынша, бұл арқылы 2029 жылға қарай алюминийдің ішкі өңделуін 5 есеге, қорғасынды 4 есеге және мысты 13 есеге көбейту көзделген.
ҚР ИИДМ басшысы Президент тапсырмасы бойынша Ұлттық инфрақұрылым жоспарын әзірлеу жұмыстары басталып жатқанын да атап өтті. Алдағы уақытта Ұлттық инфрақұрылым жоспарын әзірлеу үшін мүдделі мемлекеттік және жергілікті атқарушы органдардың өкілдерінен тұратын арнайы жұмыс тобы құрылады.
