Жамбыл облысында ерекше режимдегі түзеу мекемесінен шу шықты. Түрмедегі түсінбеушілік басшылық пен кәсіпкерлер арасында ушыққан. Жабық мекемеде кәсіп ашқандар жаңа басшылықтың заңына бағынғысы жоқ, деп хабарлайды kazbusiness.kz ақпарат агенттігі “Информбюро” жаңалықтарына сілтеме жасап.
Айтуларынша түрмеден шығатын түрлі бұйымдарға тосқауыл көбейген. Соның салдарынан астау, шахмат, нарда сияқты қолөнер туындыларын өндіру азайып кеткен. Бұл түрмеден шығуға емес кіруге талпынған топ. Таң сәріден түзету мекемесінің есігін қағып ішке ене алмай әлек. Бас аяғы 14 адам. Барлығы осында ағаштан бұйым жасаумен айналысатын кәсіпкерлер. Жазасын өтеушілер жасайтын бұйымдары шет ел асып, сұранысы зор.
“Қазақстан бойынша бүкіл облысты қамтиды. Тапсырыс болса Түркияға да кетеді. Қырғызстанға да кетіп жатыр ол. Ал антиквариат болса нарда, шахмат. Оларға шет елден де сұраныс бар”, – кәсіпкер Жәнібек Дауылбаев.
Бірақ түрмедегі бұл кәсібіміз жаңа басшылық келгелі кері кетті деп күйінеді. Бұрын тәулігіне 12 көлікпен шикізат кіргізілсе, бүгінде аптасына әзер дегенде тек ағаш өткіземіз дейді.
“Бұрын күніне 12 көлік кіретін. Екі мәрте аптасына дайын өнім шығаратынбыз. Қазір тәулігіне қиындықпен үш көлік кіреді. Тексерісті қиындатып жіберген. Ол үшін әскери прокуратураға арыз тастадық. Бірақ жауап жоқ”, – дейді жүргізушісі Валерий Русаковский.
Басшылық шеберхана маңында көптеп ашылған кәсіп талапқа сай емес дейді. Ішкі тәртіп бойынша әр кәсіпкер 20-25 жазасын өтеушіні ғана жалдай алады. Бірақ бизнесмендер 70 адамға дейін жұмылдырып келген. Ал кәсіпкерлер бұған дейін рұқсат болған істің аяқ асты заңсыз болып шыққанына аң-таң.
“Бұзыңдар кедергі дейді. Соққан кезде ДУИС-тің бастықтары рұқсат берді. Біз кеп сұрадық. Әшейін келіп өзіміздің жекеменшік жер емес қой барып сұрадық. Соқсақ бола ма? Өз билігін жүргізіп жатыр”, – дейді кәсіпкер Жәнібек Дауылбаев.
Шуласқан жұрт ақыры түрмеге кіргізілмеді. Кейін Қылмыстық атқару жүйесі департаментіне шақыртылып жиын өткізді. Бірақ түсіру тобына рұқсат етілмеді. Аз уақыт ақылдасып шыққан қос тарап бір келісімге келгендей болды. Түрме әкімшілігінің іште не айтқаны белгісіз, әйтеуір басында шу шығарған кәсіпкерлер аяғында айтқандарынан айнып шықты. Шешілген шаруаны қайта қаузауға құлық танытпаған түрме басшысы дау тудырғандармен тіл табысқандарын жеткізді.
